إستراحة _ شعر شعبي .................... بقلم : كاظم هادي الربيعي // العراق

فاضَتْ الدَمعَه .. إلذِكِركُم

وكُبرَتْ !!

ومَجبُورَه كُبرَتْ .. كُبر گلْبي حَتى إتظُمْ صُوركُم

كُونْ حِضْنِي ..

بوِسِع عَالَمْ .. يِرجَعْ ويِگدَرْ یِضُمكُم

وكُونْ

أنْفاسِي .. تِرِدْ تِحلَم ..

وتتعطَّر إبشمّة عِطِركُم

شلُون دِنيَا !!

عَمْيه .. ومتكَحلَتْ وَياي ..

إبکِحِل عين الشُّوگ مِن لَمّة شَمِلكُم

إيييه ..

إي أحِبكُم ..

يآآ.. شِواطِي أيام عُمْري الرٍّسَت يَمكُم

ويآآ.. عُمْر ضِحكاتْ گلبي إلمايِمِلكُم

إي أحِبكُم ..

وإي يَدنيا أوُداعْ .. أيام العُمُر

مطرِّزه بصَفْناتْ .. وأشْواگ وصَبُر

وعَبْرة تِشکِي إبهَمِسْ قِصَتها لنَهْر

والنّهَر يِشهَدْ..

ويِشهَگ أحِبكُم ..

ولنّه غَافي بدِفَى مَايَه .. الدِّفَى بِحُبكُم

وأفَزْ فزّة السّرْحانْ .. وَي دَمعَة صُوركُم

أدْري كُبرَتْ ..

بَسْ..

خِفِتْ وِگعَتْ .. وبَعد ما أگدَر ألِمكُم

والله أحِبكُمْ