مشتهي ومشتاق اشوفك
يا وطن
بأحلى صوره, لا اجروح
ولا محن
مجلجله عليك المسره
وتمطر اعلينه بشائر
مثل مطرات
المزن
ولا حزن مد جنحه فوكك
ولا فتن طارن اعليك
ورفرفن
مو جنت مثل العروسه
اعيون تربي اعليك
تتمنه ابتسامه
يبو اشفايف دوخني
بيش هنه اتحمرن
جنت جنه , وبيك نهرين
على كاعك نزفن ادموع الحنين
والهه بالحب غركن
وجان خيرك بحر موجه
جبل عالي
ايشوفه من ابعيد جوعان
الفقر بيه اندفن
تملي جفه من يمده
تنزعه ثوب العوز
وال جنه جفن
جنت عصفور ويغني
وجان يسمعلك ابرغبه
ويطرب وياك
الزمن
ليش هسه
جرح دامي, ودمع يجري
اخدودك الحلوات
منه اتحفرن
وليش صار الموت جمله
بيه تتاجر
والمكابر بيك حيل
اتكاثرن
وليش نخلاتك تمرهن
بالعثوك اتحشفن
وليش دجله يمشي حافي
والفرات العطش طكه
وما تلاكن بعد هنه
ومن الفراك اتسودنن
وليش تنورك طفه
وليش كل اجدورك على الكاع
يا وسفه انجفن
شنو كلي اشصار بينه
السبب واضح
شخصاه النه الطبيب
والدوه موجود
بس منهو ال يجيبه
اعتقد غالي
وما عدنه الثمن
عبد الكريم الحسون
4/3/2015
ليست هناك تعليقات:
إرسال تعليق