انا خايف علوطن ( شعر شعبي )............................. بقلم : طالب عزيز احمد /// العر اق

انا خايف علوطن
انا حزين اعلا الوطن
والله الحزن غرَّكني
ياخويه صارت مهزله
وين الصدك
بس دلني...
بجي التماسيح الكشر
علوطن يتباجون
همهم الورقات الخضر
عركة االخوشيَّه الصبح
ليليَّه يتصافون
ادليميه ترس الصحن
خبطه اوفسنجون
للخوَّه يتناخون
ذوله اللفونا ابهالوكت
باعونا بابخس ثمن
وبدمنا يتوضًّون
داعش ؟!
اوربّك جذب !!
حوشيه للمأذون!!
للبيت ( الاسوَدْ ) كِعِدْ
واللي همهم ترا
عالكرسي يتباجون!!
والحشد فزعة زلم
للوطن يتناخون
جدّامك اهل العلم
أشرف علم..
أخوة ( أميّه) اونِعِم
واهل الضلوعيَّه اتراكضو
نسوان اوزلم
بارواحهم
للوطن يفدون
واتخلط دم الوطن
من راس البيشه بالبصره
النهر العظيم ابهمَّه يتناخون

أفا يا شعب !!
نسيتو الشيعه، والسنه!!
ولكم نسيتو ( ابن حنطه)!!
نسيتو (كامل الساجت)
مو ( ساجت) السني
او (بارق) الشيعي
بس ...
ما رضو ينذل العراق
ابخيمة الأمريكان
والعربان والجربان!!
ابخيمة (الصفوان)
أومشىو...
ويغنّون
(واحنا مشينا مشينا
للوطن)
والهامه مرفوعه
( عاشك يدافع من اجل محبوبه)
لاجل الوطن والغيره
ينعدمون
جا شنهي البلاكم ..؟!
طيَّح الله حظكم!!
عماكم الدولار يا غمّان!!؟؟
اشوكِت تصحون يلعميان...
كبلكم لا السكندر المقدوني
ولا عركة اهل الجمل والصفّين
اوخوارج نهروان
ولا تيمورلنك اوكبلهم
كورَش
اوساسان...
ولا جيش الانكشاريه اوبقاياهم
ولا كوكز اوربعه وذيوله
اوبعدهم اوعلي الشرجي
مشجوله بيهم االذمّه
فالَتنه يردّون..!!
يظل العراق اموحَّد ابأهله
عالي مثل النخل
مرمر البنيان...
تظل دجله اوفراته
من رحم واحد
نظل عالعهد للموت إخوان ...
٤ حزيران ٢٠١٥