يفلانه ............................ بقلم : طالب عزيز الجليلي /// العراق

يفلانه ...
رديلي الفرح مره
ولج مليت !!
مل مني الصبر
والهم..
والبابج انا اتعنيت

كل عمر الكضى
ابلياج...
كشايه ابمهب الريح
واليوم اللي جمعني
اوياج..
ظل دمعة فرح
موش ابعيني
ترا ابروحي تتلولح
أبد ... مااتطيح
رديلي الفرح أصرخ
ولج يفلانه..!
دولبني العشك ونتي
ابلوعتي ياحيف
شمتانه..!!
جا هوه هذا الوفا؟!
إنتي اللي نكرتي العهد
والعمرالكضيته
اوياج...
موش آنا...!
أتعكز على الستين
واحلفلج...
تظل..
حد كطع النفس..
روحي...
بيج ولهانه...!!
رديلي ..
أنام ابفي كذلتج
بالصيف..
أشم اترابج اليفرح
من يزوره الضيف !!
يم دجله اوفرات
المامش من حسنها
حت بالطيف...
أفا يا كاعنا الوكحه
يا نجم اسهيل...
يلذلت اربوعج دول
ما كدرت اتذل النخل
أفا يا أم الوفا
ابصاية ( الطيبين)!!
اوخبصة شواذي
يغتصبج
اسحير الليل ....!!!
ماريد الفرح
رديلي الدمع !!
نشفت سواج العين
ماريدن عمر..
ولا ريدن حسن..
وحسين ...!!
صارو سلعة الغلمان
والعربان ..
صارو مراجيح اوكراسي
لغراب البين...!!!!

٤ تموز ٢٠١٤
د طالب الجليلي