بترافة ليل ( شعر شعبي ) ..................... بقلم : نضال الشبيبي /// العراق

بترافة ليل احس روحي تناديك
أيا غالي ولك اصحه
تصب عيني دمع تبچي وترابيك
أيا عيني شكثر وكحه
حبيبي اعضاي كلها وك تهم بيك
الك عمري النسه صبحه
تذوب الروح من تسمع طواريك
ويفز گلبي بعشقك جرحه

@@@@@
صوتك ذاب وي روحي وغفه وياي
وفرش جنح العشك فرشه
انا العطشان حضنك والعشگ ماي
اخذ روحي ونسه عَطْشه
حبيب الروح ياعلتي والي دواي
وتفز روحي بسحر غبشه
بترافة ليل اجه گلبي يسليك
عشك ليله ونسه صبحه
@@@@@@@@
حبيبي هاك كل شعري الك صار
غزل وانت الغزل اسمك
احس بالروح جمره وْ تلتهب نار
واحس گلبي اندفن يمك
اخذ روحي الجريحه بليل خطار
تسليك وتلم همك
بترافة ليل احس روحي انتخت بيك
أيا غالي دفز واصحه
مع تحيات نضال الشبيبي