دمّعْ نيروزْ شلشل على قبركْ
فَيّق زهور الدّني وحطَّها عَلَى دربك
وسقسق عطر ولهان يترحم على بابك
يستأذْنِكْ تيفوت وبغسّل قْدامِكْ
آذار يمي إجا وبوجهو حكي
بِعيونْ ملياني دَمعْ
وِخْدودْ راحَتْ تشتكي
لكنْ يا يَمّي في إلك عندي سُؤَالْ
ليشْ هالعيد هالمرّه حَزينْ
شرّش وَجَعْ ورّق أَسَى
وما ظَلْ بالوطنْ غيْرْ الأنين
بهاليوم كِنّا نِزرعِ الدنيا فَرَحْ
بهاليوم كنا نًقطف عِطِرْ ياسمين
ننشر زهورْ المحبةْ والمرَحْ
كيفِ كنا هيك يا يِمّي قَبِلْ
واليوم كبرْ الجرحْ
غابِ الصبحْ
وصارت العتمة جمرْ
معْ هلة هرَّبيع
يمي يا يمي
خيّم علينا الشرّ من عصبة قهر..
جانا يجرِّح البسماتْ
ويسوّد فجرْ
جانا غريب الدار وشَرْعَنِ الآهاتْ
وفَيّض دموعْ الإمْ والحسرات
****
يمّي خلص..
رح جفف الدمعاتْ
بْكَمشةْ صَبر
بْحَفْنةْ زهرْ
ونترك أنا والناسْ آهات الجمرْ
وننسى جحيم الهم ونوزّع عِطرْ
نْرِشْرِشْ شذى ريحانْ
نِكْتِبْ على الحِيْطان
يا يمّي انت العيدْ
والحُبْ رَحْ ينتصرْ
وبكرا الوَطَنْ يعمرْ
ويورّق من جديدْ
ليست هناك تعليقات:
إرسال تعليق