خلص ماي البحر وماخلص وني
ابجي عله الوطن ابكبر سني
جثيره اتحوف صارت ولا يرده حيد
لون راح اليصد ريح الطمع عني
طاغي الجان موش اتكول ؟..آنه وياك .
بس لاهو باك ولا خطف ابني .
لادنس عرض لاحره ليه ظام
لا واحد وكف وعلى الرصيف وباع
جا تدري كبل محرم ومحظور
انواع المخدر اللي دمرني
لا هو الباك فلس لو دينار
مليارات الحرام انت بايكني
ياهو املاك الشعب عليه علّه السور
ولا رد السلب وفوكاهه هددني
طاح حظ الوكت البيه صار الحك من حامي الشرع حكي سالبني
ياهو الباع وبيا وكت تنباع املاك الشعب والشاري حاكمني
جا دولة شعب احنه لو رعيان والملاج لاجله حاصل الناعور
واليسكت عن الحك شيطان .. اخرس موش
جا العنده الصدك واجب يجاوبني
موش عناد لاوالله والعباس بس آنه الحقيقه الصافيه همي
المجرم طليق والشعب مسجون.. لو لاله
تهجير وخطف وقتل وهتك اعراض .. لو لاله
جنه ابضيم وقهر او جوع ..
جا منك شفت غير الفقر هدني ؟
القاتل برىء والحكم للمظلوم
من جيت العدل للهام غركني !!!!
اقصور وفلل وسبايك ذهب او دولار
تتصور غشيمه الناس باللي صار
هيه والوطن ابصفقه للاجناب ابرخص الثمن انت بايعني
اشباقي بعد كلي جاوبني
نكطه الغيره مو جره لو طاحت
لامستحه لاخوف من الله
من حافي النعال حصره جان عليك
مليارات الرصيد وتدعي الاسلام
جا بيه الخمط سنه شرع الله
كلي منين جتك كلي جاوبني
انته التنهب او انته التحاسبني
شتكول للامام من تلزم الشباج
اشطلب من تزور الضريح بالله
تكله الحرام البيه انت تعيش .. خمسته
من سنين تنهب ولا خفت الله ولا عرفته
يصرخ بيك ا مشي يامخازي العيب
بالك تلمس الشباج لو تكرب اليمي
صحايف نور اطهار العرب ابرار لايوم عله بينه ذكر ظني
تدري الصار باخوىه من طلب حكه ..
وشصار اباديه من جوية الجمره
عدل ..انصاف ..والاصل اشراف
المنبت طهور مزين ابعفه
وانت الكل جبيره افعلت واحويت . .
مو منه اليمد ايده عله حك الناس
مو منه اليمس شيلة مره ويزني
مو منه لاوالله والسبب اشماجان
تحرك جثة المسلم وجاي كاصدني
ايمانك جذب بالتاريخ وصمة عار
ياوسفه الخلك صارت تعاتبني
سالوفة ونس صرنه للرايح جاي
بري منك كل وصل مني .
جبير انت يالكرار فوك الراس
ياتاج الحلم بالحكمه ماتنقاس
هاذانه الظلم عاليني والبيتن
داري الاسكنه وبيت مال الناس
لاحاكم يحفظه وتنهبه الحراس
لارب يخافه.. لاقرآن ..لا آل البيت .
حسافه من يرفع ابهمه للشكبان
باسمك ينتخي من يحمل المنهوب
الصدك احنه السبب واللي بينه ايصير
ظنينه الردي يحفظ قسم قرآن
ولا ينقض عهد ..من خيري يحرمني
تاليه الندم ميفيد الفاس دك الراس
مااقبل بعد لا والله يحكمني
واليوم الفعل صار بيد الناس
لاحاكم يظل عالكرسي ظالمني
ليست هناك تعليقات:
إرسال تعليق