حلم ينزف
گطًّر عالجرح همّك
ونزف حلمك ولك يفلان
عندك حيل وتشيله ؟؟؟؟
وْلَوَنْ حيلك هفت ياصاح
ومامش حيل عندك
وك تصيح الاااااخ
ومامش أخ تشكيله
اجهب عالحمل يفلان
عندك حيل لو لاله؟؟؟
ولَوَن هد التعب جسمك
وفوكه الحزن تجماله
لون دمعة عرس بسمك
لون لون الكحل رسمك
لون صار الحزن مهره
وانت اتصير خيّاله
لون مهدود حيلك
لونك بالحلم مجروح
وبس تنوح
يَچَنّه البين جرحك والدهر سچّين
يحلمك بالصبر مذبوح
وهمّك بس حصاده إوْنين
وجرحك بالحلم ينزف بگاله سنين
عوف الحمل وك مطروح
مالك حيل وتشيله
ولا حيلك جمع حيله
ولا ام التشيله بليل تلوليه
عراقي انت وعشك لهموم
عراق انت وعلصبر مفطوم
يفارس عاشك كحيله
خله العشك وك مهظوم
لو فز الفجر
وك بهداي لوليله
وْلَوَن حلمك نده فجره
ولون صبرك عشگ گبره
ولون حزنك فهم قهره
كوم الفجر صلّيله
ولون دهرك عرف ذنبه
حَشْمْ الروح وشكيله
ولك صمت الدهر صابر
ياراهب عشك صومه
بگه طول الدهر جوعان
عيب وعيب ... عيب
اتفَطْرَكْ العيله
يفارس عشك جرحه وطاح
وك بهداي تجيله
ولك يفلان بس تنوح
عراقي معلم الحرمان
ولك يفلان
يجنّك موكد الديوان
الجمر هافت،،، وبرد حيله
البگه منّه ، بس ارماد توشيله
يموگد هفت جمره ولك يفلان
هفت نار الصبر مو جان بركان
وجان العشك وك انسان
انطفه بليل وبرد ليله
هاك الصيخ وابحث بالرماد الصار
هلبت نار تضويله
وارجع بالجفوف ابحث
لم الحيل هفيله
حزينه الروح يبنادم
عراقي والحلم طال
وبقه بليل الشته يرجف
حَشْم اغاطاك دفيله
يجن اللاله لهبت نار
والفانوس تعليله
وجرح ال بالحلم ينزف
احسّم بيه طول الليل
وك لو طاح اتجيله
واظل وحدي اصيح الاخ
واصبّر بيك
تراهو الدهر يبنادم
جار إعْلَ لعزيز وشاخ
بالك تْوَطّي الراس تشكيله
وبالك يوم تحجيله
لون صمت الدهر جوعان
لونك انت بس انسان
عيب وعيب
وعيب تفطرك العيله
وعيب تفطرك العيله
@@@@@
ليست هناك تعليقات:
إرسال تعليق