الزمان الحلو راجع
بالأمانى وبالموده
بس حبة صبر ياللى
انجرحت من الزمانده
الزمان الحلو راجع
فى الحلم او فى الحقيقه
هينتشلنا من المواجع
ويرجع الدنيا البريئه
ويجَرد الشوك اللى موت
فى نفوسنا أحلى ورده
🌴🌴🌴
عيش ع الأمل زيي
واستنى ظهوره
مش حرام ان احنا نحلم
مش حرام نستنى نوره
الزمان الحلو احنا
لو مانعرف مستحيل
لما نتغير هنلقى
كل شيئ أصبح جميل
لما نتحسن هنأطف
كل يوم أجمل زهوره
🌴🌴🌴
مجرد حلم من شاعر
أصابه جنان
عَمال يفتش فى البشر
عن الإنسان
اللى فيه الطيبه
والأمان والإنسانيه
اللى فيه الرحمه
والقناعه والروحانيه
اللى فيه الحب
والرضا والحنان
🌴🌴🌴
مانيش قصدى ألوم واحد
ولا طبعى أكون جَراح
أنا شاعر ووظيفتى
اخلق م الدموع أفراح
واداوى جرح بكلامى
وافَرّح قلب
واشغل من ظلام الليل
فجر وشروق وصباح
🌴🌴🌴
أنا باحلم ليك وليّا
بزمان فيه الوفا
فيه المبادئ النبيله
والأصاله والصفا
فيه البساطة والعطاء
فيه الدفا
فيه النخوه والرجوله
والشهامه والرضا
يالّه زيى احلم وقول
للزمانده فَرْمل كَفا
ليست هناك تعليقات:
إرسال تعليق