نامي
والدفو بعينج سلام
وتبقه نظراتج حنان
وتبقه جنحانج امل لولادج امان
وتبقه چلماتج عسل حلو الكلام
نامي يم گلب الحنون
طيره صيري
وطيري وي سرب الحمام
كل حرف منج قصيده
ونتي ديوان القصايد
واني شاعر
وكتبت حرفي بحزن وزخة دموع
وناري تبقه تستعر جوا الضلوع
لن دموعي نزلت يعوده
وضاعت احروف القصيده
وانطفت كل الشموع
ياخساره وياحرام
ياخساره وياحرام
وچ يخيتي شلون رحتي؟
وك يملچ الموت اصبر
لهسه ماخلص حجينا
والكلام بعده كلام
والدمع محبوس ظل حدر الجفن
وغابت النظره الحنونه
بدروب ظلمه وي الحزن
والروح شهكت للسما
والگلب مجروح امتحن
والشوگ فوگ الشوگ ابروحي انسحن
وچ يعوده كومي شگييه للچفن
سمعي بنتج ،، سمعي ابنچ
يريدون امهم
كومي عوده سمعي ابنج
يگلي خال ،، اريد امي
گتله يبني هاي امك
راحت ارتاحت من المها
راحت ارتاحت من وجعها
راحت ارتاحت من حزنها
والحزن راح اندفن
امك تعيش بسلام
بعالم النور
وانت اكبر عيش وامشي للامام
وخلي امك بروحك انت
بكلبك انت
عيش اجمل ذكريات وي امك
عيش لحظات الطفوله وي امك
امك بروحك تعيش
وانتي عوده ابنج ويانه امانه
في امان حتّى ليام اللقاء
نامي والدفو بعينج سلام
نامي بعيونك رجاء
ليست هناك تعليقات:
إرسال تعليق