سميتك الحرامي ياتشرين .................... بقلم : ليندا السعد / سوريا

سميتك الحرامي ياتشرين
ياسارق زهر الياسمين
أبداً مابخاف منك
لكن بقلق على نيسان
شي يوم تغمرو الأحزان
معقول!
الغيم مايحمل مطر
والورد ماينشر عطر
وبنطر ياربيع تطل
وترجع أيام الفل
والشجر اللي مزاعل
الخريف
نسمع منو الحفيف
ومستني هالبرعم ينبت
من جديد
وناطر اسمع من الطير
تغريد
مابدي فكر بالمجهول
بدي نام واحلم بالقمر
بالزهر بالحقل بالفجر
بالطفولة لما بتغفى بعد
اللعب
بالمرجوحة لما بتضحك
للريح
بالدفتر المسطر
بحروف الأبجدية
بحبات الرمل
بلون العشب
بولد عم يركض تحت المطر
حامل كتب
وختيار حامل شمسية
بدي نام واحلم بالحرية
اللي خلقت فيي
اللي كانت ومابعرف
وين هيي
بدي اغفى واحلم
بالشمس
بالنجمة
بمركبة فضائية
يمكن اقدر افرح أكتر
يمكن احلم أنا عم اكبر
يمكن ارجع لزمن عنتر
كانت عبلى وكان الحب
وكان الشعر
يمحي كل جنون الحرب
مش ذنبك ياتشرين
بس نحنا هيك اتعلمنا
نرمي الظلم على المساكين
وحتى اتغيرت القوانين
صار الغلط هو الصح
والحقيقة مدري لوين
واضحة متل عين الشمس
لكن البشر معميين
لاتزعل ياتشرين
اكتار متلك مظلومين
وانظلموا سنين وسنين
بكرا لما تصير ختيار
بيقولوا ماالنا ذنب
كانت حكمة الأقدار
وبيكذبوا باسم الحب
وعالقبر بيحطوا أزهار
هيك القصة
وهيك صار
وماالها يد الأقدار

١١/١ /٢٠١٦