يوميات شهيد................. بقلم : حسن الأقصري / مصر

الشهداء هم أولى الناس بعيد الحب 🔫🇪🇬💔💣🇪🇬🔫
 

شايل هموم الوطن
على كتفي وسلاحي
والكل نام الليل
ولوحدي أنا صاحي
مصلوب بليل الشتا
مكوي بنار الصيف
سرحان ف لحظة دفا
وأحسب ساعات الخوف
والكل عايش وأنا
مكفي على جراحي
أسلي نفسي بنفسي
وأكلم الأحجار
وكل ثانيه تعدي
عليا جمر ونار
والكل فرحان وأنا
ممنوعه أفراحي
باقي عليا سنه
وألبس هدوم العيد
وأخلع هدوم الضنا
وأجبلي لبس جديد
وأعملي زفة فرح
فيها عريس وسعيد
بدال م عايش هنا
بحلم وأنا صاحي
ليلي طويل إنما
بكره أكيد جايلي
دنيا مسيرك بقى
حتجيلي تتحايلي
باقي سنه ف دفعتي
وأروح لأمي سعيد
شايل شرف خدمتي
لبلدي ف التجنيد
إرتحت من مخلتي
وسلمت أنا سلاحي
حيكون دا يوم المنى
وأسهر. مع صحابي
وأحس طعم الهنا
والفرح صباحي
وفلحظه راح الحلم
وخد معاه الفرحه
جسمي إللي واقف حجر
هيل مع الصرخه
لما رصاصة الغدر
جاتلي بدون مواعيد
وإرتحت من وقفتي
وأخدت إسم شهيد
نار وبارود ف القلب
تغدر بلا تفكير
أصرخ بصوتي الحي
كأني طفل كبير
جايلك يا أمي خلاص
ملفوف مع جراحي
إطمني ياما
ربك مضيعنيش
حلوه الحياه لما
أموت وروحي تعيش
لو تعرفي ياما
في الجنه حالي إزاي
وبقيت أنا ياما
إسمي الشهيد الحي
قولي لخطيبتي خلاص
شوفي عريس غيري
الجنه حورها كتير
خمري وتفاحي

🇪🇬💔🔫🇪🇬💣