إلى المعلم وللمسؤولين في كل بلد..
كلُّ يومٍ من أيام السنة عيد للمعلم
إسـتاذْ اسْـمكْ كبير
مزخـرفْ عقـولْ و صـورْ
وقلوب مزهَّرهْ تقطـرْ عطـر ْ
إسـتاذْ اسـمكْ سـوسني تُنْشُـرْ عَبيرْ
كِلْمـةْ مِسِـكْ ملوَّنةْ
رفّتْ على خـدّ الدني
رَفْـعِتْ سـما بنيِتْ قصـرْ
كَتْبِتْ على عتـابْ الدهـرْ
قِصِّــةْ عمــرْ
زرعِتْ على شـفافِ السـما
بسـمةْ صـبرْ
اسـتاذْ اسـمكْ على صـدرْ الهـدى
نيشــانْ
قُبْلـي على جبينْ الرجـا00
كِلمـةْ وفــا
تِصْدَحْ على شـفافِ المـدى وتقول:
كبير إنت إنْت
يا إِنسـانْ
شـعشعْ بنـوركْ وافتـدي
لا تِرْتجـي00 كيفْ تبتدي؟
عِلْمـك لغيـرك ينهـدى
كبشْ الفـدا
إنت يـا إنسـان
اسـتاذْ
اسْـمُو على صـدْرِالهدى نيشــان؟؟
* **
إسـتاذ اسْمكْ صبرْ
دَرْبَكْ علـى طـولِِ المـدى
هـمْ وقهر
عِلْمَـك لغيـركْ ينهـدى
لـولاكْ يا كبشِ الفِـدا
لا وردْ عطّرْ ولا زهَّر الليمونْ
لولاكْ يـا كبشْ الفــدا
كِـلْ الدِّني مقيَّـده
بْعَتْمِـةْْ ليـلْ كانـونْ
وشـو كبير إنت إنت يـا إنسـان
***
عِلْـمْ وهُـدى سُـهدْ وسَـهَـرْ
وجُـروحْ تـاكُلْ منِ جـروحْ
وكِلْ ما انْدَمَـلْ جُـرْحْ
ِتْنِفـتِحْ بَدْلو جـروحْ
وإنـتْ يا انسان
صـبْرَكْ علـى قَهْـرَكْ
فـوقْ جُرْحَكِ المفتـوحْ
***
ليشْ الحكـي
لا تِرْتِجـي منْهُـمْ ِبِكـي
عيـونْ مـا بتشـوفْ
معصَّـبي تِخْمِيــنْ
وشـفِّهْ على شـفِّهْ مقطَّبيْ
ترسِـلْ أنيــنْ
وكيف السمعْ مـا دامتْ الخيطانْ
علـى الصـيوانْ
تِنْـدِفْ قطـنْ وتسـكِّرْ الآذانْ
" لا بسـمعْ و لا بقشـعْ
و لا ظَـلْ عـندي لسـانْ"
نِسْـيوكْ يـا انسـان
ونسـيوا يـا عمـري
يُـومْ كـانُـوا صـغارْ
ونسـيوا الوفـا
وكيـف صـاروا كبـارْ
وشــو كبيرْ
إنت إنت يـا انسـان
***
شَـعْشِـعْ بنورَكْ وانْتِشـي
فيـك المحبهْ تغْتني وتِحْلا الدنـي
وكِـلْ ما كِبِـْر عِلْمـكْ
نجحْ فـنَّكْ
وانْزَرَعْ مجدْ وعُلا
صـرتْ أكبــر ْ
وصـارْ الحـلا أحــلى
وصـرْتْ بالقلـبْ أغلـى
ترقُصْ معـك فرحـةْ عُمـرْ
لمِّنْ على دربِ العـلا تلْـمحْ رتــلْ
يـرسُـمْ علـى شْـفافْ الدني
شـارةْ نصــرْ
دربْ المحبّـي يغتنــي
يغـزلْ خصــرْ
نغـمةْ ســحرْ
تغزل على نول العمـر وتقـول:
استاذ اسمكْ على صدر الهدى
نيـشانْ
قُبلْـي على جبينْ الرجـا
كلمـةْ وفــا
تِصدَحْ على شفافْ المـدى وتقول:
"شـو كبير
إنت إنـت يا اسـتاذ؟؟؟
/ 24/ آذار 2021
ليست هناك تعليقات:
إرسال تعليق