جنة عدن (شعر شعبي) ............... بقلم : طالب عزيز الجليلي // العراق

تميت الولي عالوطن
بس كونه ساعه ايهيد
بس كون يصحى الشعب
مو كافي راح ايبيد
والخوّه ترجع عسى
ونخلي إيد ابأيد

نبني الوطن صبح اومسا
ونغني ليليه
ندفن عداوات الامس
وانصفّي النيّه
بغداد ترجع شمس
ليليه صفكه اوعرس
تتراكص اشجار اونخل
منبع ثقافه اوزجل
للوطن هيَّه الريَّه
ادري به هذا حِلًمْ
بس عوزه فزعة زِلِمْ
غايتها تنقذ وطن
تتسلح ابهِمِّه اوعزم
مابيها ترك اوعجم
اولا للبداوه جِدِمْ
مامش اعمامه اوسِبَحْ
اولا بيها داعِش نِبَحْ
امصلصل عراقي الأصل
ما يحني راسه الجبل
ينقذنا من هذا الدَجَلْ
والعنده مذهب يحب
خَل بغسله العاره
من كونه مذهب ذهب
خل يجلي زنجاره
واحد يظل هذا الوطن
مايبدل اطواره
حت لو تحطم وكت
هم ياخذ ابثاره
يرجع .. يرد جنة عدن
يعبرها والله المحن
وولاده فيّاره....
٢٣ شباط ٢٠١٥